တရုတ် Online App အိန္ဒိယပိတ်ပင်မှု တရုတ်ပြစ်တင်ဝေဖန်

ပြည်တွင်းလုံခြုံရေးအကြောင်းပြချက်နဲ့ ဖုန်း App တချို့ကို အိန္ဒိယက ပိတ်ပင်လိုက်တဲ့အပေါ် တရုတ်နိုင်ငံက ပြစ်တင် ဝေဖန်လိုက်ပါတယ်။ ဒါဟာ နျူကလီးယားလက်နက်ပိုင်ဆိုင်ထားတဲ့ အိမ်နီးချင်း နှစ်နိုင်ငံအကြား တင်းမာမှုဖြစ်ပေါ်စေတဲ့ နောက်ဆုံးအကြောင်းအရာ တခု ဖြစ်လာပါတယ်။

ပြီးခဲ့တဲ့ ဇွန်လအတွင်း အငြင်းပွားဖွယ်ဖြစ်နေတဲ့ နယ်စပ်ဒေသမှာ နှစ်ဘက် ထိပ်တိုက်ရင်ဆိုင်မှုတွေ ဖြစ်ရာက အိန္ဒိယတပ်သား ၂၀ သေဆုံးပြီး တရုတ်ဘက်ကလည်း အရေအတွက်အတိအကျ မသိနိုင်တဲ့အတိုင်းအတာနဲ့ ထိခိုက် ဒဏ်ရာရမှုတွေ ဖြစ်ပေါ်ခဲ့ပြီးတဲ့နောက် နှစ်နိုင်ငံအကြား တင်းမာမှုတွေ တောက်လျှောက် ရှိနေခဲ့တာပါ။

အိန္ဒိယရဲ့ အမျိုးသားလုံခြုံရေးနဲ့ အချုပ်အခြာအာဏာ ပိုင်ဆိုင်မှုကို ခြိမ်းခြောက်တယ်ဆိုတဲ့ စွပ်စွဲချက်နဲ့ တရုတ်နိုင်ငံက e-commerce ကုမ္ပဏီကြီးဖြစ်တဲ့ Alibaba က App အပါအဝင် အိန္ဒိယနိုင်ငံအတွင်း အသုံးပြုနေတဲ့ တရုတ် App ၄၃ ခုကို အိန္ဒိယက ပိတ်ပင် ကန့်သတ်လိုက်တာပါ။

အမျိုးသားလုံခြုံရေးအကြောင်းပြပြီး အိန္ဒိယရဲ့ အခုလို လုပ်ဆောင်ချက်အပေါ် အထူး စိုးရိမ်ပူပန်ကြောင်း တရုတ်နိုင်ငံခြားရေးဌာန ပြောခွင့်ရ Zhao Lijian က ပြောပါတယ်။

“အိန္ဒိယရဲ့ အခုလို လုပ်ဆောင်ချက်ဟာ WTO - ကမ္ဘာ့ကုန်သွယ်ရေးအဖွဲ့ကြီးက ချမှတ်ထားတဲ့ စည်းကမ်းချက်တွေကို ချိုးဖောက်ရာရောက်သလို၊ တရုတ်ရဲ့ အကျိုးစီးပွားနဲ့ ဥပဒေလမ်းကြောင်းအရ ရပိုင်ခွင့်အခွင့်အလမ်းတွေကို အကြီးအကျယ် ထိခိုက် နစ်နာစေပါတယ်။ ဒါကြောင့် ဒီလုပ်ရပ်ကို အပြင်းအထန် ကန့်ကွက်ပါတယ်” - လို့ ပြောသွားတာပါ။

နှစ်နိုင်ငံပူးပေါင်းဆောင်ရွက်မှုတွေ ဒီထက်ပိုပြီး ဆိုးမသွားစေဖို့ နှိမ့်ချဆက်ဆံတဲ့ အဲဒီ ဆုံးဖြတ်ချက်ကို အိန္ဒိယအနေနဲ့ အမြန်ဆုံး ပြန်လည် ပြင်ဆင်သင့်ကြောင်းလည်း တရုတ်နိုင်ငံခြားရေးဌာန ပြောခွင့်ရက ပြောကြားခဲ့ပါတယ်။

တရုတ်နိုင်ငံက နာမည်ကြီး လူကြိုက်များတဲ့ TikTok App အပါအဝင် တရုတ် App ၅၃ ခုကို အိန္ဒိယအစိုးရက အစောပိုင်းမှာ အသုံးပြုခွင့် ပိတ်ပင်ခဲ့ပြီး နောက်ထပ် Mobile Application ၁၁၈ ခုကိုလည်း စက်တင်ဘာလမှာ ပိတ်ပင်ခဲ့ပါတယ်။

အခုနောက်ဆုံး ပိတ်ပင်ခံလိုက်ရတဲ့ App တွေထဲမှာ Alibaba ရဲ့ AliExpress ၊ ကုန်ပစ္စည်းပို့ဆောင်တဲ့ Lalamove နဲ့ တခြား အွန်လိုင်း ကြင်ယာရှာတဲ့ App နဲ့ တိုက်ရိုက် ထုတ်လွှင့်ပြသလို့ရနိုင်တဲ့ App တွေ ပါဝင်တယ်လို့ ဆိုပါတယ်။

VOA News