ကျောက်ပန်းတောင်းမြို့နယ်သည် ရပ်ကွက် ၁၂ ခု၊ ကျေးရွာအုပ်စု ၁၀၉ စု၊ ကျေးရွာပေါင်း ၃၃၉ ရွာဖြင့် ဖွဲ့စည်းထားပြီး လူဦးရေပေါင်း ၂၉၅၅၂၆ ကျော် နေထိုင်ပါသည်။ မြို့နယ်သည် အရှေ့မှ အနောက်သို့ ၂၆.၇၅၂ မိုင်၊ တောင်မှမြောက်သို့ ၂၈.၃၄၇ မိုင်ရှိပြီး ၇၅၈.၃၅ စတုရန်းမိုင် ကျယ်ဝန်းသည်။ ကျောက်ပန်းတောင်းမြို့နယ်၏ အရှေ့ဘက်တွင် မိတ္ထီလာမြို့နယ်၊ တောင်ဘက်တွင် မကွေးတိုင်းရှိ နတ်မောက်မြို့နယ်နှင့် ရေနံချောင်းမြို့နယ်၊ အနောက်ဘက်တွင် ညောင်ဦးမြို့နယ်နှင့် မကွေးတိုင်းရှိ ချောက်မြို့နယ်နှင့် မြောက်ဘက်တွင် တောင်သာမြို့နယ်၊ မလှိုင်မြို့နယ်တို့တည်ရှိသည်။ ပင်လယ်ရေမြေနှာပြင်အထက် ၁၂၂၄ ပေအထက်တွင်တည်ရှိကာ တောင်ကုန်းတောင်တန်းများပေါများသကဲ့သို့ သဲဆန်သောမြေပြန့်များလည်းရှိသည်။ မြို့နယ်အတွင်းတွင် တောင်ဇင်းချောင်းသည် မြောက်မှ တောင်သို့စီးဆင်းနေသည်။ ကျောက်ပုံချောင်းနှင့် ပင်းချောင်းသည် အရှေ့မှအနောက်သို့စီးဆင်းနေသည်။ အရှေ့ဘက်နှင့် အရှေ့မြောက်ဘက်တို့တွင် တောင်ကုန်းတောင်တန်းများပေါပြီး တောင်ဘက်တွင် စိုက်ပျိုးရန်အတွက် အသုံးဝင်သည့် သဲဆန်သောမြေပြန့်လွင်ပြင်များရှိသည်။
ဒေသသမိုင်းအကျဉ်း
ကျောက်ပန်းတောင်းမြို့ကို အနော်ရထာမင်းစော၏ တာဝန်ပေးချက်အရ အမတ်ကြီး သီဟပတေ့သည် မြန်မာသက္ကရာဇ် ၃၀၇ ခုနှစ်တွင် ခေါင်းနီအိမ်ကန်အရှေ့ဘက်ရှိ သရက်ချဉ်ရွာ၊ ညောင်စောက်ရွာ၊ မကျီးစောက်ရွာနှင့် လေးရွာအုပ်စု အစရှိသည့်ကျေးရွာပေါင်း လေးရွာကို စုပေါင်း၍ ယခုကျောက်ပန်းတောင်းမြို့တည်ရာအရပ်၌ တည်ထောင်ခဲ့သည်။ ကျောက်ပန်းတောင်းဟုခေါ်တွင်ရခြင်းမှာ ကုန်းတော်ကြီးဘုရားတည်ရှိရာ တောင်တန်းတွင် ကျောက်ပန်းများ ထူထပ်စွာပေါက်ရောက်နေသည်ကို တွေ့ရှိရသဖြင့် ကျောက်ပန်းများကို အစွဲပြု၍ မြို့အမည်ကို (သေဠာ၊ ပုပ္ဖ၊ ပပ္ပက-သေဠာ=ကျောက်၊ ပုပ္ဖ=ပန်း၊ ပပ္ပက=တောင်) ကျောက်များ ပန်ဆင်ထားသကဲ့သို့ ရှိနေသောတောင်ကို အစွဲပြု၍ ကျောက်ပန်းတောင်ဟုခေါ်လာရာမှ နောင်တွင် ကျောက်ပန်းတောင်ဟုခေါ်တွင်ခဲ့သည်။ ပြည်ထဲရေးဝန်ကြီးဌာနမှ ၁၉၇၂ ခုနှစ် ဩဂုတ် ၃၁ ရက်နေ့တွင် ကျောက်ပန်းတောင်းမြို့ကို ဖွဲ့စည်းခဲ့ပြီး ၁၉၇၃ ခုနှစ် ဖေဖော်ဝါရီ ၂၈ ရက်နေ့တွင် မြို့နယ်ကိုဖွဲ့စည်းခဲ့သည်။ ၂၀၁၄ ခုနှစ် ဇန်နဝါရီ ၁၅ ရက်နေ့တွင် ကျောက်ပန်းတောင်းမြို့နယ်ကို မြင်းခြံခရိုင်မှ ညောင်ဦးခရိုင်အတွင်း ပြောင်းလဲဖွဲ့စည်းခဲ့သည်။