ဒဂုံမြို့သစ်တောင်ပိုင်းမြို့နယ်သည် ရပ်ကွက် ၄၄ ရပ်ကွက်ဖြင့် ဖွဲ့စည်းထားပြီး လူဦးရေပေါင်း ၃၂၅၈၈၆ ကျော်နေထိုင်ပါသည်။ မြို့နယ်သည် အရှေ့မှအနောက်သို့ ၃ မိုင်ခန့်နှင့် တောင်မှမြောက်သို့ ၁၂ မိုင် ခန့်ရှည်းလျားပါသည်။ ဒဂုံမြို့သစ်(တောင်ပိုင်း)မြို့နယ်၏အရှေ့ဘက်တွင် ဒဂုံမြို့သစ်(ဆိပ်ကမ်း)မြို့နယ်၊ တောင်ဘက်တွင် သာကေတမြို့နယ်နှင့် သင်္ဃန်းကျွန်း မြို့နယ်၊ အနောက်ဘက်တွင် ဒဂုံမြို့သစ်(မြောက်ပိုင်း/အရှေ့ပိုင်း)မြို့နယ်၊ မြောက်ဘက်တွင် လှည်းကူးမြို့နယ်တို့နှင့် နယ်နိမိတ်ထိစပ်လျက်ရှိပါသည်။ မြစ်ချောင်းများနည်းပြီး ငမိုး ရိပ်ချောင်း၊ မအူချောင်း၊ လေးဒေါင့်ကန်ချောင်းများသာရှိပြီး အများစုမှာ ရေချို များဖြစ်၍စိုက်ပျိုးရေရရှိနိုင်ပါသည်။ ငမိုးရိပ်ချောင်း၊ မအူချောင်းမှာ စက်လှေများသွားလာ နိုင်သောချောင်းဖြစ်ပါသည်။
ဒေသသမိုင်းအကျဉ်း
ပြည်ထဲရေးနှင့်သာသနာရေး၀န်ကြီးဌာန၏ (၈.၁၁.၁၉၈၉) ရက်စွဲပါအမိန့်ပြန်တမ်းဖြင့် ဒဂုံမြို့သစ်မြို့နယ်ကို ဖွဲ့စည်းခဲ့ပြီး၊ (၄.၁၁.၁၉၉၀) ရက်နေ့တွင်ဒဂုံမြို့သစ်အား ဒဂုံမြို့သစ် (တောင်ပိုင်း) မြို့နယ် ၊ ဒဂုံမြို့သစ် (မြောက်ပိုင်း) မြို့နယ်ဟူ၍ မြို့နယ် ၂ မြို့နယ် ခွဲခြားသတ်မှတ်ခဲ့ပါသည်။ ပြည်ထဲရေးဝန်ကြီး ဌာန၏ (၁၉.၈.၁၉၉၄)ရက်စွဲပါ အမိန့်ပြန်တမ်းဖြင့် ဒဂုံမြို့သစ်(တောင်ပိုင်း)မြို့နယ်အား ဒဂုံမြို့သစ်(တောင်ပိုင်း)နှင့် ဒဂုံမြို့သစ်မှ(ဆိပ်ကမ်း)ဟူ၍ မြို့နယ် ၂ ခုထပ်မံခွဲခြားခဲ့ရာ ဒဂုံမြို့သစ်(တောင်ပိုင်း) မြို့နယ်တွင် ရပ်ကွက် ၂၆ ခု ၊ ကျေးရွာအုပ်စု ၆ အုပ်စုဖြင့်ဖွဲ့စည်းထားရှိခဲ့ပါသည်။ ပြည်ထဲရေး၀န်ကြီးဌာန၏ (၂၉.၁.၂၀၀၉) ရက်စွဲပါ စာအမှတ်၊ ၂၀၀ / ၂၂-၂၀၈ / ဦး ၁ မှ မြို့နယ် ဧရိယာ ၁၉၅၄၉ ဧကရှိပြီး၊ ဧရိယာစတုရန်းမိုင်ပေါင်း ၃၀.၅၄၅ စတုရန်းမိုင်ရှိပါသည်။ ရပ်ကွက် ၄၄ ရပ်ကွက်ဖြင့် သတ်မှတ်ဖွဲ့စည်းလိုက်ပြီး ယခင်ကျေးရွာများဖြစ်သည့် ရှမ်းတဲကြီး၊ စိုက်ပျိုးမွေးမြူရေး အမှတ်(၁)၊ လေးဒေါင့်ကန်၊ သုံးခွ၊ ကျီစု(အနောက်)၊ ရွာသာကြီးကျေးရွာ များ ကိုရပ်ကွက်များအဖြစ် ပြင်ဆင်ဖွဲ့စည်းခဲ့ပါသည်။ ဤမြို့နယ်ရုံးကို (၄.၁.၁၉၉၂) ရက်နေ့တွင် ယခင်တိုင်း အုပ်ချုပ်ရေးမှူးဦးထွန်းတင်မှ ဖွင့်လှစ်ပေးခဲ့ပါသည်။