ဦးမင်းနောင်(အမည်ရင်း ဦးကျော်မြင့်)ကို မိဘများဖြစ်ကြသော ဦးဘချစ်မောင်နှင့် ဒေါ်တင့်မေတို့မှ ၂-၂-၁၉၃၁ ခုနှစ်တွင် ရန်ကုန်မြို့ အနောက်ပိုင်း၌ မွေးဖွားခဲ့သည်။
စောင်း ဦးခင်မြင့် ၊ စောင်း ဦးဘသန်း တို့ထံတွင် တပည့်ခံ သင်ယူခဲ့သည်။
၁၉၄၇ခုနှစ်မှစ၍ စန္ဒယားသီဟ အပျော်တမ်း တူရိယာအဖွဲ့တွင် " လုံမေ ၊ မဉ္ဇူဆွေ ၊ နီလာ ၊ ရွှေမိုးညို ၊ မတိမ်းသင့်ပါဘူးမေရယ် ၊ စိမ်း ၊ ရွှေရည်လူး ၊ လွမ်းစာမွဲ ၊ ဝေးပြီခင်ရေ " စသော ကိုယ်တိုင်ရေးသီချင်းများ စတင် သီဆိုခဲ့သည်။
ထို့နောက် စန္ဒယားကိုအောင်ကိုး ဦးစီးသည့် ချိုတေးဆက်အဖွဲ့တွင် ပင်တိုင်အဆိုတော်အဖြစ်ဖြင့် " ဖော်မဲ့တေးသံ ၊ နင်လားဟဲ့ လောကဓံ ၊ ဘဝဟူသည် ၊ အို-စောင်း ရှင်ရယ် " သီချင်းများဖြင့် ထင်ရှားလာခဲ့သည်။
ဂီတလုလင် မောင်ကိုကိုတူရိယာအဖွဲ့ဖြင့် သီဆိုခဲ့သော ဘိုကလေးတင့်အောင် ရေးသားသည့် တက္ကသိုလ်ကျောင်းသူတဦး ၊ ဂျင်မလေးဂျမ်း ၊ ဇရာ ၊ လ ရောင် အောက်က သီချင်းသည် " သီချင်းတို့မှာ နာမည်ကျော်ကြား လူကြိုက်များလှသောတေးသီချင်းများ ဖြစ်ခဲ့သည်။
ထို့နောက် " မြတ်ရွှေတိဂုံ ၊ နတ်သျှင်နောင် ၊ မုန်းရစ်လေဦး ၊ ချစ်မိုးကြီး ၊ တကမ္ဘာ ခြားလည်း ချစ်နေမယ် ၊ မမေ့တဲ့နိုင် ၊ လုလင်ငယ်သွေး " စသော ခက်ခဲနက်နဲသည့် သီချင်းများဖြင့် ဂီတအနုပညာလောကတွင် မှတ်ကျောက်တင် ခံနိုင်ခဲ့သည်။
ထို့အပြင် " ပွဲကြိုက်ခင် ၊ ဂီတ အခြေခံ " စသော ဂန္ထဝင် သီချင်းများ ၊ ဂီတ ညီအမများနှင့် " သက်ဝေ ၊ မြန်မာ နာရီမှူး ၊ သီတင်းကျွတ်ပါပီ ၊ ချမ်းငြိမ့်မေတ္တာ ၊ နန်းကေသီ ၊ နှောင်းချစ်ရက် သံသရာ " စသော စုံတွဲတေးများ။ ရုပ်ရှင်ဇာတ်ကားများ၏ ဇာတ်ဝင်နောက်ခံ တေးသီချင်းပေါင်း မြောက်များစွာကိုလည်း သီဆိုခဲ့ရသည်။
ရုပ်ရှင်နယ်ပယ်တွင်လည်း ရုပ်ရှင်သရုပ်ဆောင်အဖြစ် " ဘ၀ချင်းဆုံတွေ့ပါရစေ ၊ ရွက်ဝါ ၊ တစ် မိုးသောက် သော် ၊ သမန်းကျား ၊ ချစ်သူတို့သာပျော်ပါစေ နှင့် မောင်မောင်ဆိုလေထီးရိုးရှည် " အစ ရှိသော ဇာတ်ကား ၆ ကားခန့် ရိုက်ကူးခဲ့ရသည်။
၂၀၀၅-၂၀၀၆ခုနှစ်တွင် ရုပ်ရှင်အကယ်ဒမီ ရွေးချယ်ရေး အဖွဲ့ဝင်အဖြစ် လည်းကောင်း၊ တပ်မတော်နေ့ အထိမ်းအမှတ် စစ်ချီစစ်ရေး တေးသီချင်းပြိုင်ပွဲ စိစစ်ရေး အဖွဲ့ဝင်အဖြစ် လည်းကောင်း ဆောင်ရွက်ခဲ့သည်။
၂၀၀၄-၂၀၀၇ခုနှစ်အထိ အမျိုးသားညီလာခံတွင် ညီလာခံကိုယ်စားလှယ်အဖြစ် တက်ရောက်ခဲ့သည်။နိုင်ငံတော်၏ နှစ်စဉ် ကျင်းပခဲ့သော မြန်မာ့ရိုးရာ အဆို၊ အက၊ အရေး၊ အတီးပြိုင်ပွဲများတွင် အဆိုအကဲဖြတ်(ဗဟို)အဖြစ် လည်းကောင်း ၊ မြန်မာ့အသံ ခေတ်ပေါ်တေးဂီတ စိစစ်ရေးဘုတ်အဖွဲ့ဝင်အဖြစ် လည်းကောင်း ၊ ပြန်ကြားရေး ဝန်ကြီးဌာန ခေတ်ဟောင်း တေးရေးပညာရှင်ကြီးများ၏ တေးသီချင်းများနှင့် အတ္ထုပ္ပတ္တိမှတ်တမ်း စိစစ် ရေးကော်မတီ အဖွဲ့ဝင်အဖြစ် လည်းကောင်း ၊ မြန်မာနိုင်ငံ ဂီတ အစည်းအရုံး( ဗဟို )၏ နာယကအဖြစ် လည်းကောင်း ဆောင်ရွက်ခဲ့သည်။
၂၀၀၄ခုနှစ်တွင် နိုင်ငံတော်အစိုးရမှ ချီးမြှင့်သော လူမှုထူးချွန် ( ပထမအဆင့် ) ရရှိခဲ့သည်။
၂၀၁၂ခုနှစ်တွင် နိုင်ငံတော်အစိုးရမှ ချီးမြှင့်သော စည်သူဘွဲ့ ကို ရရှိခဲ့သည်။
ငယ်စဉ်ဘဝ မောင်ကျော်မြင့်သည် ၁၄-၀၆-၅၈ တွင် မရီရီမြင့် ( တေးသံရှင် ရီလေး )နှင့် စထရင်းဟော်တယ်တွင် လက်ဆက်ခဲ့ပြီး သားသမီး ၄ ဦး ထွန်းကားခဲ့သည်။
၂၀၁၉ ဇန္နဝါရီ ၃၁ရက် ညနေ ၅ နာရီ၄၅ မိနစ်တွင် ကွယ်လွန်ခဲ့သည်။
