ရန်ကုန် နိုဝင်ဘာ ၇
အင်းစိန်မြို့နယ် ကမ်းနားအနောက်ရပ်ကွက် ရွေးကောက်ပွဲကော်မရှင် အဖွဲ့ခွဲရုံးတွင် ဆန္ဒမဲပေးပိုင်ခွင့်ရှိသူ ၆၂၅၉ ဦးရှိပြီး အင်းစိန်တစ်မြို့နယ်လုံး အနေဖြင့် မဲရုံ ၁၉၆ ရုံနှင့် ဆန္ဒမဲပေးပိုင်ခွင့်ရှိသူ ၂၃၀၀၀၀ ကျော် ရှိကြောင်း သိရသည်။
ရန်ကုန်မြောက်ပိုင်းခရိုင် အင်းစိန်မြို့နယ်၌ နိုဝင်ဘာ ၈ ရက်တွင် ပြုလုပ်မည့် ပါတီစုံဒီမိုကရေစီ အထွေထွေရွေးကောက်ပွဲ အောင်မြင်စွာကျင်းပ နိုင်ရေးနှင့် မဲဆန္ဒရှင်ပြည်သူများ အေးချမ်းလုံခြုံဘေးကင်းစွာ ဆန္ဒမဲပေးနိုင်ရေး အတွက် မြို့နယ်တာဝန်ရှိသူများက မြို့နယ်အတွင်းရှိ မဲရုံများကို စစ်ဆေး ဆောင်ရွက်လျက်ရှိရာ ယနေ့ ညနေ ၃ နာရီတွင် အင်းစိန်မြို့နယ် ကမ်းနားအနောက်ရပ်ကွက် ရွေးကောက်ပွဲကော်မရှင်အဖွဲ့ခွဲရုံး၌ ကျန်းမာရေးနှင့် အားကစားဝန်ကြီးဌာနမှ ထုတ်ပြန်ထားသည့် ကိုဗစ်-၁၉ ရောဂါ ကြိုတင် ကာကွယ်တားဆီးရေးလုပ်ငန်း လမ်းညွှန်ချက်များနှင့်အညီ ရပ်ကွက်အတွင်းရှိ မဲရုံငါးရုံအား စနစ်တကျ ပြင်ဆင်ဆောင်ရွက်ထားရှိမှုနှင့် မဲရုံအမှတ် (၂) နှင့် အမှတ်(၄) မဲရုံနှစ်ရုံအား အောင်ဇေယျတံတားအောက်၌ မဲရုံပြင်ဆင်ဆောင်ရွက်ထားရှိမှုများအား တာဝန်ရှိသူများက လာရောက်စစ်ဆေးခဲ့ကြကြောင်း ရပ်ကွက်ရွေးကောက်ပွဲကော်မရှင်အဖွဲ့ခွဲ အတွင်းရေးမှူး ဦးဇေယျထွန်းထံမှ သိရသည်။
ဉာဏ်ဟိန်း