မြန်မာနိုင်ငံကပ်ရောဂါကာလ အိမ်တွင်းအကြမ်းဖက်မှု ၇ ဆ တိုးလာ

ကိုဗစ်ကပ်ရောဂါကာလ အမျိုးသမီးတွေ အိမ်တွင်းအကြမ်းဖက်မှုခံရမှု သိသိသာသာ တိုးလာနေတယ်လို့ ကုလသမဂ္ဂ အမျိုးသမီးရေးရာ အဖွဲ့က ပြောဆိုလိုက်တဲ့ အချိန်မှာပဲ၊ မြန်မာနိုင်ငံမှာလည်း ၇ ဆ တိုးလာတဲ့အကြောင်း အမျိုးသမီးရေး လှုပ်ရှားမှုအဖွဲ့ရဲ့ စစ်တမ်းတခုက တွေ့ရှိခဲ့တဲ့အကြောင်း ပြောပြပါမယ်။

မြန်မာနိုင်ငံမှာ ကိုဗစ်ကပ်ရောဂါကာလ အမျိုးသမီးတွေ အိမ်တွင်းအကြမ်းဖက်ခံရမှုတွေ အရင်နှစ်ကထက် ၇ ဆအထိ တိုးလာတယ်လို့ အမျိုးသမီးအရေးဆောင်ရွက်နေတဲ့ အခရာ အမျိုးသမီးအဖွဲ့က ထုတ်ပြန်လိုက်တဲ့ အစီရင်ခံစာက ဖော်ပြလိုက်ပါတယ်။ ပြီးခဲ့တဲ့ ၂၀၁၉ ဇန်နဝါရီလကနေ မေလအတွင်း အိမ်တွင်းအကြမ်းဖက်မှု ၁၈ မှုသာ ရှိခဲ့ပေမဲ့ ဒီနှစ် ၂၀၂၀ ပြည့်နှစ်အတွင်း အလားတူကာလအတွင်း ၅၁ မှုထက်မနည်း ရှိခဲ့တာ တွေ့ရကြောင်း ပြောဆိုခဲ့တာပါ။

အထူးသဖြင့် မြန်မာနိုင်ငံမှာ ကပ်ရောဂါကာလ ကြုံရချိန်မှာ သွားလာလှုပ်ရှားမှုတွေ ကန့်သတ်ထားချိန်မှာ အိမ်တွင်းအကြမ်းဖက်မှုတွေ ပိုတွေ့ခဲ့ရတယ်လို့လည်း အခရာအမျိုးသမီးအဖွဲ့ တည်ထောင်သူ ဒေါ်ထားထားက ပြောပါတယ်။

“Hot Line တွေဘာတွေပါ ၄ နေရာ၊ ၅ နေရာလောက် ချဲ့လိုက်ရတယ်။ ပြီးတော့ အမတို့ ပါတနာတွေနဲ့ ၉ နေရာလောက်မှာပေါ့နော်။ partner တွေကို Grant ပေးပြီးတော့ပေါ့နော်။ ဘယ်နေရာတွေမှာ ဘယ်လို အကူအညီတွေပေးနိုင်အောင်ဆိုပြီးတော့ ထည့်လိုက်ရတယ် ချက်ချင်းပဲ။ ပြီးတော့ Hot Line တွေလည်းထည့်လိုက်ရတယ်။ အခုဆိုရင်တော့ အရင်က မတ်လ၊ ဧပြီ၊ မေ၊ ဇွန်လောက်အထိပေါ့နော်။ တော်တော်တက်တာ ခုတော့ အဲ့ဒီလောက်ထိတော့ တက်မလာတော့ဘူး။ ဒါပေမဲ့ ပြီးခဲ့တဲ့ နှစ်တွေကထက်တော့ တက်နေသေးတယ်။”

ကုလသမဂ္ဂ အမျိုးသမီးရေး လှုပ်ရှားမှုအဖွဲ့ကလည်း ကိုဗစ်ကပ်ရောဂါကာလအတွင်း ကမ္ဘာတဝန်းက သန်းနဲ့ချီတဲ့ အမျိုးသမီးတွေ အိမ်တွင်းအကြမ်းဖက်မှုတွေနဲ့ ရင်ဆိုင်ခဲ့ရကြောင်း ပြောဆိုထားပါတယ်။ ကပ်ရောဂါကူးစက်မှု အန္တရာယ်ကြောင့် မလိုအပ်ဘဲ အိမ်ပြင်မထွက်ဖို့ ပြောထားတဲ့အချိန်မှာပဲ လက်တွဲဖော် ဒါမှမဟုတ် ခင်ပွန်းဖြစ်သူတို့ရဲ့ လိင်ပိုင်း၊ ရုပ်ပိုင်းဆိုင်ရာ အကြမ်းဖက်ခံရမှုတွေနဲ့ ရင်ဆိုင်ခဲ့ရသူ အသက် ၁၅ နှစ်ကနေ ၄၉ နှစ်ကြား အမျိုးသမီးနဲ့ မိန်းကလေး ၂၄၃ သန်း ရှိကြောင်း ကုလသမဂ္ဂ အမျိုးသမီးရေး လှုပ်ရှားမှုအဖွဲ့က သတင်းထုတ်ပြန်ခဲ့တာပါ။ အိမ်တွင်းအကြမ်းဖက်ခံရသူ အမျိုးသမီးတွေထဲမှာ ၄၀ ရာခိုင်နှုန်းလောက်ကသာ တိုင်ကြားတာ၊ အကူအညီတောင်းတွေ ရှိခဲ့ပြီး အများစုက မိသားစုနဲ့ မိတ်ဆွေတွေကိုသာ အကူအညီတောင်းလေ့ရှိတယ်လို့လည်း ဖော်ပြထားပါတယ်။

မြန်မာနိုင်ငံမှာလည်း အမျိုးသမီးတွေနဲ့ ကလေးငယ်တွေ အိမ်တွင်းအကြမ်းဖက်ခံရမှုတွေနဲ့ ပတ်သက်လို့ အသိပညာပေးတာတွေနဲ့ အကူအညီပေးတာတွေ အားနည်းနေတာကလည်း အဓိကစိန်ခေါ်မှုတခု ဖြစ်နေတယ်လို့ အခရာအဖွဲ့က ဒေါ်ထားထားကပြောပါတယ်။

“မိသားစုတွင်း အနိုင်ကျင့်တာပဲလို့ သိလာရင်တောင် တိုင်ဖို့ ဆုံးဖြတ်တဲ့လူ တိုင်ချင်တဲ့လူ၊ တိုင်မယ်ဆိုတဲ့ သတ္တိရှိတဲ့လူ ဖွင့်ပြောမယ်ဆိုတဲ့ သတ္တိရှိတဲ့သူတွေရဲ့ ရာခိုင်နှုန်းသည် အရမ်းနည်းအုံးမယ်။ ဆိုတော့လေ ဒီမှာ အမ တစ်ခါ တည်းပြောချင်တာက အစိုးရအဖွဲ့ဝင် တစ်ရုံးရုံးကို ဖုန်းဆက်လိုက်ပါ သိရင်။ အဲ့ဒီလိုဆက်လိုက်ရင် လူမှုဝန်ထမ်း ဦးစီးဌာနကို ဆက်ရမယ်ဆိုတာ သိလာမယ်။ အမျိုးသမီးအဖွဲ့တွေကို ဆက်ရမယ်ဆိုတာ သိလာမယ်။ ရဲဌာနကို တိုင်တိုင်၊ မတိုင်တိုင်၊ အမှုဖွင့်ဖွင့်၊ မဖွင့်ဖွင့် ဖုန်းဆက်လိုက်ပါ။ ရဲဌာနကို ဖုန်းဆက်ပြီး ဘယ်လို အမျိုးသမီးအဖွဲ့တွေ ရှိသလဲလို့ မေးလိုက်ပါ။ နာမည်တစ်ခုခုပြောပါလိမ့်မယ်။ ဖုန်းနံပါတ်တစ်ခုခု ရပါလိမ့်မယ်။”

ကုလသမဂ္ဂ အမျိုးသမီးရေး လှုပ်ရှားမှုအဖွဲ့ကတော့ ကပ်ရောဂါကာလရဲ့ နောက်ဆက်တွဲ အကျိုးဆက်အဖြစ် ဘေးကင်းလုံခြုံရေး၊ ကျန်းမာရေးနဲ့ ငွေရေးကြေးရေးအတွက် စိုးရိမ်ပူပန်မှုတွေ မြင့်တက်လာရာက မိသားစုတွေမှာ အကြပ်အတည်းတွေနဲ့အတူ အိမ်တွင်းအကြမ်းဖက်မှုတွေလည်း ပိုများလာနိုင်တယ်လို့ သတိပေးထားပါတယ်။

VOA News