ရွေးကောက်ပွဲအလွန် ကပ်ရောဂါသတိထားဖို့ ကျန်းမာရေးဝန်ထမ်းတွေ တိုက်တွန်း
မြန်မာနိုင်ငံမှာ ကိုဗစ် ၁၉ ကူးစက်မြန်ရောဂါဖြစ်ပွားမှု နေ့စဉ်လို ထောင်နဲ့ချီ ကူးစက်နေချိန်မှာပဲ ရွေးကောက်ပွဲကြီးမှာ လူထောင်သောင်းချီ အုပ်စုလိုက် အပြင်ထွက် မဲပေးခဲ့ကြပြီးတဲ့နောက် နောက်ဆက်တွဲ ကူးစက်မှု အန္တရာယ်တွေကို သတိထားစောင့်ကြည့်ကြဖို့ ဆေးပညာရှင်တွေနဲ့ ဆရာဝန်တွေဘက်က အထူးသတိပေးပြောဆိုလိုက်ပါတယ်။ ကျန်းမာရေးဆိုင်ရာ ဘယ်လိုအချက်တွေကို သတိထားစောင့်ကြည့် ကာကွယ်သင့်ပါသလဲ ဆိုတာ ဗွီအိုအေမြန်မာပိုင်း သတင်းထောက် မဆုမွန်က စုစည်းတင်ပြပေးထားပါတယ်။
နိုင်ငံတဝှမ်းမှာ ကိုဗစ် ၁၉ ရောဂါ ကူးစက်မှုနှုန်းမကျဘဲ ဆက်ဖြစ်ပွားနေချိန် ဒီရက်ပိုင်းမှာပဲကျင်းပခဲ့တဲ့ ရွေးကောက်ပွဲအကြို ကြိုတင်မဲပေးပွဲတွေနဲ့ နောက် နိုဝင်ဘာလ ၈ ရက်နေ့က ကျင်းပခဲ့တဲ့ ရွေးကောက်ပွဲနေ့မှာ ရပ်ကွက်မြို့နယ် ကျေးရွာအလိုက် ထောင်သောင်းချီတဲ့ ပြည်သူလူထုတွေ ဆန္ဒမဲ ထွက်ပေးခဲ့ကြပါတယ်။ ဒီမဲဆန္ဒရှင်ပြည်သူတွေအတွက် ပြည်ထောင်စုရွေးကောက်ပွဲကော်မရှင်ဘက်က ကိုဗစ် ၁၉ ရောဂါကူးစက်မှု ကာကွယ်ရေး ကျန်းမာရေး လမ်းညွှန်ချက်တွေနဲ့ အညီ စီစဉ်ဆောင်ရွက်ပေးခဲ့တယ်လို့ ဆိုပေမဲ့ မဲပေးခဲ့တဲ့ မိဘပြည်သူတွေအနေနဲ့ တကယ်လို့ ဒီရက်ပိုင်း ဒါမှမဟုတ် ဒီသီတင်းပတ်ထဲမှာ မိမိမှာ ကူးစက်မြန်ရောဂါ လက္ခဏာဖြစ်နေတယ်လို့ သံသယရှိလာခဲ့ရင် အနီးစပ်ဆုံး အခမဲ့ ဖျားနာကုဆေးခန်းတွေ နဲ့ ဆေးရုံတွေဆီ အမြန်ဆုံးသွားပြဖို့နဲ့ ကိုယ်သွားခဲ့တဲ့ မဲရုံ- နေရာတွေ ထိတွေ့ခဲ့သူတွေကို သေချာ ပွင့်ပွင့်လင်းလင်းပြောကြပါလို့ ဆေးပညာရှင်တွေက တိုက်တွန်းလိုက်ပါတယ်။
ရောဂါလက္ခဏာပြလာရင် စောစီးစွာ ကုသမှုခံယူကြဖို့အပြင် လမ်းပေါ်တွေထွက် အောင်ပွဲခံကြမယ့်ပြည်သူတွေလည်း ကိုဗစ်ရောဂါ အုပ်စုလိုက် မကူးစက်ရအောင် အထူးသတိထား ဂရုစိုက်ကြဖို့ အခမဲ့ဖျားနာကုဆေးခန်း ရန်ကုန်ကွန်ရက် တာဝန်ခံ ဒေါက်တာကျော်မင်းထွန်းက မေတ္တာရပ်ခံပါတယ်။
"ရွေးကောက်ပွဲက မနေ့က အောင်အောင်မြင်မြင်နဲ့ ချောချောမွေ့မွေ့ ပြီးဆုံးသွားပြီပေါ့နော်။ ပြည်သူလူထုတွေဘက်ကလည်း စည်းကမ်း စနစ်တကျ လိုက်နာပြီး မဲလာပေးတာတွေ့ရပါတယ်။ ကျနော်တို့ သွားထည့်တဲ့ မဲရုံမှာလည်း သေချာလေး စည်းနဲ့ကမ်းနဲ့ စနစ်တကျ လုပ်ထားတာလေးတွေ တွေ့တယ်။ ဆိုတော့ Infection Control မှာ အရမ်းအားကောင်းတယ် အရမ်းလည်း အားရတယ်။ ဘာတွေကို နောက်ဆက်တွဲသတိထားရမလဲဆိုတော့-လူတွေက လမ်းတွေပေါ်သွားလာခဲ့ကြပြီ ဆိုတော့ အတတ်နိုင်ဆုံး ဒီကာလမှာ သတိထားရမှာက တကယ်လို့ Infection ဝင်ပြီး ကူးစက်မှုဖြစ်လို့ တရက် နှစ်ရက်လောက်နေရင် များသောအားဖြင့်Symptoms ကပြကြတယ်။ နှာစေးသလိုလို ဖျားချင်သလိုလို လက္ခဏာလေးတွေ ပြလာနိုင်တယ်။ တချို့ကျတော့ ကိုယ်လက်တွေ ကိုက်တယ်။ ရာသီတုပ်ကွေးပုံစံမျိုး လက္ခဏာလေးတွေ ပြလာတယ်ဆိုရင် နည်းနည်းသတိထားရမယ်။ စပြီး သတိထားရတော့မယ်ပေါ့နော်။ အဲ့လိုဖြစ်လာပြီဆိုရင် အဲ့ဒီ့အချိန်မှာ အမြန်ဆုံးပေါ့နော်... ကျနော်တို့ Fever Clinic ဖြစ်ဖြစ်၊ ဆေးရုံနီးတယ်ဆိုရင် ဆေးရုံဆေးခန်းကိုဖြစ်ဖြစ် အကျိုးအကြောင်းပြော ပြသပါ။ နောက် ကျနော်တို့ ကျမတို့တွေ ဒီမဲရုံတွေကို သွားထားတယ်။ အပြင်တွေ ဘယ်နေရာတွေ သွားထားတယ်။ ဘယ်သူတွေနဲ့ Contact ထိထားတယ်။ ကိုယ်သွားထားတဲ့ အများပြည်သူနေရာတွေ Public Area တွေရဲ့ History ပေါ့နော် ဖြစ်စဉ်ကို Detail အသေးစိတ်ပြောပြဖို့လိုမယ်။ ကိုယ့်မှာ ရောဂါလက္ခဏာပြပြီဆိုတာ ချက်ခြင်းသိသိချင်း ချက်ခြင်းသွားပြပါ၊ တိုင်ပင်ပါ။ လိုအပ်လာရင်လည်း ချက်ခြင်း Urgent Swab ယူလို့ရအောင်လည်း စီစဉ်မယ်။ ကျနော်တို့ဘက်ကလည်းလုပ်ပေးနိုင်တာက တကယ်လို့ Emergency ဆို ချက်ခြင်းဆေးရုံ လွှဲမယ် ဆေးရုံပို့ပေးမယ်ပေါ့နော်။ ဒီကာလမှာ အထူးဂရုစိုက်စေချင်တယ် ကိုဗစ်ကလည်း ရှိနေသေးတယ်။ ပျော်တာကလည်း ပျော်ကြပါ။ အခုက ရွေးကောက်ပွဲပြီးတော့ နောက်ဆက်တွဲ ရလဒ်တွေလည်း ရှိနေသေးတယ် ဆိုတော့။ ပျော်စရာ Result တွေ ထွက်လာမယ်ဆိုရင် ပျော်ကြပါ အရမ်းကြီးလည်း အပျော်လည်းမလွန်ကြပါနဲ့လို့။ သေသေချာချာ စည်းနဲ့ကမ်းနဲ့ပျော်ပါ။ Mask တပ်ပါ။ Mask ကို အမှုမဲ့ အမှတ်မဲ့ချွတ်ပြီးတော့ အောင်ပွဲကြီးတွေ မခံကြပါနဲ့။ အဲ့ဒီလိုမျိုး ကျနော်တို့ဘက်က မေတ္တာရပ်ခံပါတယ်ခင်ဗျ။"
ပြည်ထောင်စုရွေးကောက်ပွဲ ကော်မရှင်ဘက်ကလည်း ရွေးကောက်ပွဲရလဒ်တွေ ရေတွက်ချိန် လူစုလူဝေးမဖြစ်စေဖို့ မိမိတို့ရဲ့နေအိမ်တွေထဲကသာ စောင့်ကြည့်ခြင်းအားဖြင့် ကျန်းမာရေးလမ်းညွှန်ချက် တွေနဲ့ အညီ ပူးပေါင်းကူညီကြဖို့ကိုလည်း ပြည်သူကို မေတ္တာရပ်ခံထားပါတယ်။
ဒီလိုကူးစက်မြန်ရောဂါ လူအုပ်စုတွေကြား ကူးစက်မှုမဖြစ်အောင် တဦးချင်း အထူးသတိထားဖို့လိုသလို သက်ဆိုင်ရာ ဘက်ကလည်း စည်းကမ်းချက်တွေ လိုက်နာဖို့ ထိရောက်စွာကြီးကြပ်မှုပေးဖို့လိုတယ်လို့ လူထုကို ကျန်းမာရေးပညာပေးနေတဲ့ အထွေထွေရောဂါကုဆရာဝန်ကြီး ဒေါက်တာမိုးအောင်ကျော်နိုင် ကလည်း အကြံပေးပါတယ်။
"ရွေးကောက်ပွဲမတိုင်ခင်ကတည်းက ရန်ကုန်မှာ လူတွေ တော်တော်များများ လုပ်ငန်းခွင်ပြန်ရောက်နေကြတာတွေ့တယ်။ ဆိုလိုတာက လမ်းပေါ်မှာ ကားတွေအများကြီးရှိတယ်။ ဆိုင်တွေလည်းတချို့ပြန်ပြီးတော့ ဖွင့်နေတာတွေ့တယ်ပေါ့နော်။ ပျံ့နှံ့မှုကိုတော့ လောလောဆယ် လွယ်လွယ်နဲ့ တားနိုင်မယ်မဟုတ်ဘူးလို့ ထင်တယ်။ နောက် တဦးချင်း တဦးချင်းစီရဲ့ တာဝန်ယူမှုတွေမှာလည်း လိုအပ်ချက်တွေ ရှိသေးတယ်။ Mask ကိုဖြုတ်ပြီး ကွမ်းတံတွေးထွေးတဲ့သူတွေတွေ့တယ်။ Mask ကိုမေးမှာချိတ်ပြီး တဦးချင်းစီရဲ့လိုက်နာမှု အားနည်းနေသေးတယ်လို့မြင်တယ်။ အခုက ကူးစက်မှုနှုန်း ပိုးတွေ့မှုနှုန်းက မြင့်နေသေးတော့ ကိုယ်မပါဖို့အတွက် ကိုယ့်ဘာသာ ဂရုစိုက်မှပဲ ရမယ်လို့ ဆရာကပြောချင်တယ်။ လူတိုင်းမှာ ပိုးရှိနိုင်တယ်လို့ သဘောထားပြီး ကိုယ့်အတွက် ကာကွယ်ရေးတွေကို ဆက်ပြီးဆောင်ရွက်သွားရမယ်။
နို့မို့ဆိုရင် အခုက သေတဲ့နှုန်းနဲ့ တွေ့တဲ့နှုန်းက တန်းနေတာ အခုဆိုရင် ၂ပတ် - ၃ပတ် က ဒီအတိုင်းနှုန်းနဲ့သွားနေတယ်။ ဒီလူတွေရဲ့ အပြုအမှုတွေ မပြင်သရွေ့ကတော့ ဆက်ပြီး ဒီအတိုင်းပဲ သွားနေမယ် ဆရာ့အမြင်ပေါ့နော်။ တဦး တဦးချင်းက ဒီ့ထက်ပို နည်းနည်းလေးပို ဂရုစိုက်ရမယ် နောက် ကြီးကြပ်မှုပေါ့။ ဥပမာဆို ကားမှတ်တိုင်မှာ ကားစောင့်နေတုန်း Mask ချွတ်ပြီး ကွမ်းတံတွေးထွေးလိုက်သူကို ဘယ်သူက ပြောမှာလဲ ဘယ်သူက အရေးယူမှာလဲပေါ့။ ဒီလိုကြီးကြပ်မှုတွေမှာ တော်တော်လေးကို အားနည်းတဲ့အခါကျတော့ လူက ကိုယ်လုပ်ချင်သလိုလုပ်မယ်။ ကိုယ့်လွတ်လပ်ခွင့်ဆိုပြီး ကိုယ်နေချင်သလိုနေမယ်ဆိုပြီး နေတော့ ပိုးတွေက အဲ့ဒီလို ပံံျ့နှံမှုတွေ ရှိနိုင်တယ်။အဲ့တော့ ကိုယ့်ကတော့ တဦးချင်းအနေနဲ့ ကိုယ့်ဆီ မရောက်အောင် ပိုးမကူးအောင်နေလို့ပဲရမယ်။ အရေးယူကြီးကြပ်မှုပိုင်းမှာတော့ သက်ဆိုင်ရာတာဝန်ရှိသူတွေဘက်က အဆင့်ဆင့်ဆောင်ရွက်သွားဖို့ လိုအပ်နေသေးတယ်လို့ ဆရာကတော့မြင်တယ်။"
ကမ္ဘာ့ကပ်ရောဂါ ကိုဗစ် ၁၉ ရောဂါပိုး နေ့စဉ်လို လူထောင်ချီကူးစက်မှုရှိနေတဲ့ မြန်မာနိုင်ငံမှာ မနေ့ နိုဝင်ဘာလ ၈ ရက်နေ့ က ကူးစက်သူပေါင်း ၁,၀၂၉ ဦး အပါအဝင် နိုဝင်ဘာလ ၉ ရက်နေ့ ည ၈ နာရီ နောက်ဆုံးသတင်း ထုတ်ပြန်ချက်တွေအရဆိုရင် ရောဂါပိုးကူးစက်သူ ၆၁,၉၇၅ ဦး နဲ့ သေဆုံးသူက ၁,၄၃၇ ဦးအထိ ရှိလာနေပြီဖြစ်လို့ ပြည်သူတွေ မပေါ့ဆပဲ ကူးစက်မြန်ရောဂါ မကူးစက်စေရေး ကျန်းမာရေး အထူးဂရုစိုက် ကာကွယ်ကြဖို့ ဆေးပညာရှင်တွေနဲ့ ဆရာဝန်တွေက အလေးအနက် မေတ္တာရပ်ခံသတိပေးနေတာဖြစ်ပါတယ်။
Crd VOA News