ကန် ကိုဗစ်ကူးစက်မှု တနေ့တည်း ၂၀ ရာခိုင်နှုန်းတိုး

ကိုရိုနာဗိုင်းရပ်စ် ကပ်ရောဂါနဲ့ ပတ်သက်ပြီး စောင့်ကြည့် မှတ်တမ်းတင်နေတဲ့ Johns Hopkins တက္ကသိုလ် စစ်တမ်းအရ အမေရိကန်နိုင်ငံမှာ သောကြာနေ့က တရက်အတွင်း ကူးစက်မှု ၁၈၄,၅၁၄ နဲ့ နောက်ထပ် စံချိန်သစ်တင်ခဲ့ပါတယ်။

ကြာသပတေးနေ့က တသိန်းခွဲကျော် ရှိခဲ့တာကြောင့် သောကြာနေ့မှာ ရာခိုင်နှုန်း ၂၀ တိုးလာတာ ဖြစ်ကြောင်းနဲ့ အခုဆို ကူးစက်သူ ၁၀.၈ သန်းကျော်နဲ့ ကမ္ဘာမှာ အများဆုံး ဖြစ်နေတာပါ။ သေဆုံးရသူကလည်း ၂ သိန်းခွဲနီးပါး ဖြစ်နေပါတယ်။

ဒီရောဂါကူးစက်မှု ခြေရာခံတဲ့ COVID Tracking Project ကတော့ သောကြာနေ့မှာ လူပေါင်း ၇၀,၀၀၀ နီးပါး ဒီရောဂါနဲ့ ဆေးရုံတင်ခဲ့ရပြီး ဒါဟာ ကြာသပတေးနေ့ကထက် လူ ၂,၀၀၀ လောက် ပိုများလာတာလို့ ပြောပါတယ်။

အမေရိကန်နိုင်ငံမှာ အနောက်ပိုင်းက ကယ်လီဖိုးနီးယားနဲ့ တောင်ပိုင်းက တက္ကဆက်ပြည်နယ်တွေမှာ ဒီရောဂါ ကူးစက်ခံရသူ တသန်းကျော်ရှိနေပြီး Ohio, Iowa, Nebraska နဲ့ Indiana ပြည်နယ်အပါအဝင် အနောက်အလယ်ပိုင်း ဒေသတွေမှာ ကူးစက်မှု တိုးလာနေတာပါ။

အမေရိကန်ပြည်သူတွေ ဒီကပ်ရောဂါဒဏ် ခံနေရတာအတွက် ကယ်ဆယ်ကူညီရေး ရန်ပုံငွေ ချထားပေးရေး ဥပဒေ အတည်ပြုနိုင်အောင် လုပ်ဆောင်ကြဖို့ သမ္မတ Donald Trump က စနေနေ့မှာ တွစ်တာကနေ လွှတ်တော်အမတ်တွေကို တိုက်တွန်းလိုက်ပါတယ်။ ဒီဥပဒေအတွက် ဒီမိုကရက်တစ်ပါတီဝင်တွေရဲ့ ပံ့ပိုးမှုလိုအပ်ပြီး ဒီရောဂါအတွက် ဦးတည်တဲ့ ရန်ပုံငွေချထားပေးရေး လွှတ်တော်က လုပ်ဆောင်ဖို့ ပြောကြားခဲ့တာပါ။

Crd VOA News